മെസ്സോസോയിക്ക്

സാന്ധ്യ പ്രകാശത്തില്‍
ദൂരെ നിന്നു നോക്കിയാല്‍
ഹെവി എക്ക്യുപ്പ്മെന്റുകള്‍
അയവെട്ടി വിശ്രമിക്കുന്ന മൈതാനം
ദിനോസറുകളുടെ
തൊഴുത്തു പോലെ തോന്നും

നീണ്ട കഴുത്തുള്ള
ടവര്‍ ക്രെയിനുകള്‍
പല്ലു നിവര്‍ത്തി
വായ് തുറന്നിരിക്കുന്ന
ആ‍ര്‍ത്തിപ്പിടിച്ച ബുള്‍ഡോസറുകള്‍
കൈയ്യും തലയുമൊന്നായ കോരികള്‍
അവശിഷ്ടങ്ങള്‍ക്കുമേല്‍
യഥേഷ്ടം മേഞ്ഞു നടക്കുന്ന
വലിയ പൂച്ചകള്‍

എന്നായിരിക്കാം
ഇവ തുടലുകള്‍ പൊട്ടിക്കുക
കണ്ടതും കാണാത്തതും തകര്‍ക്കുക
കെട്ടിപൊക്കിയ ഉയര്‍ച്ചകളെല്ലാം
ഇടിച്ചുകളയുന്നതു എന്നാ‍യിരിക്കാം


എല്ലാം നിലം പരിശാകുമ്പോള്‍
ദിനോസറുകളേ
നിങ്ങള്‍
നിങ്ങളുടെ
ലോകം
തിരിച്ചു പിടിക്കും

പെണ്‍ വശം

കുപ്പിവളകള്‍
അറിയാതെ പൊട്ടിച്ചതിനു
രണ്ടു മിട്ടായി
അധികം തിന്നതിന്
മീന്‍ വറുത്തതിന്റെ
നടുക്കഷ്ണം
കൊടുക്കാത്തതിനു

ഭദ്രകാളി ചമഞ്ഞ്
ചൂലെടുത്ത്
വീടിനു ചുറ്റും ഓടിച്ചിട്ടുണ്ട്
നോട്ടു പുസ്തകം
കുത്തിവര കൊണ്ടു നിറച്ചിട്ടുണ്ട്
ഷര്‍ട്ടിന്റെ കീശകള്‍
വലിച്ചു കീറിയിട്ടുണ്ട്

ഇപ്പോള്‍
അയാള്‍ എത്ര ശകാരിച്ചാലും
എത്ര തല്ലിയാലും
അവളെ തന്നെ കത്തിച്ചാ‍ലും
ഒന്നും മിണ്ടാതെ
മിഴി താഴ്ത്തി നില്‍ക്കുന്നതു
വളര്‍ന്നതു കൊണ്ടു മാത്രമോ

സന്ധ്യ

രണ്ടു പേരും
ഒരേ സമയത്ത് രോഗികളായി

ഇഴഞ്ഞും ഇരുന്നും
തളര്‍ന്നും യൌവ്വനത്തിലെ വാര്‍ദ്ധക്യത്തിന്റെ
ചെറിയ ദൂരങ്ങള്‍
താണ്ടുമ്പോള്‍ ഓര്‍ത്തു

അങ്ങകലെ
ഇത്ര വലിയ ദൂരങ്ങള്‍
എങ്ങിനെയാണ് അവര്‍
ഇഴഞ്ഞു തീര്‍ക്കുന്നതെന്ന്

പൊടുന്നനെ ഞങ്ങള്‍
ഞങ്ങളുടെ
അച്ഛനും അമ്മയുമായി

ഉള്‍ കടല്‍

കണ്ണീ‍രില്‍ ഉപ്പുണ്ട്
ഓരോ കരച്ചിലും
ഉള്ളിലെ കടലിനെ
തുറന്നു വിടലാണ്

കരയാത്തവന്റെ ഉള്ളിലാണു
തിളച്ചു മറിയുന്ന
ഏറ്റവും വലിയ കടല്‍

സീബ്ര വര

BMW X5
LAND CRUISER
MERCEDES S CLASS
NISSAN PATROL

നിര്‍ത്താതെ കടന്നു പോയി
പിക്ക് അപ്പുകളും
ടാക്സികളും നിര്‍ത്തി
കടന്നു പോകാന്‍
അനുമതി നല്‍കി

അവര്‍ക്കറിയാം
ജീവിതം മുറിച്ചു കടക്കുക
അത്ര എളുപ്പമല്ലെന്നു

മുറിച്ചു കടക്കേണ്ടവര്‍ക്ക്
ഓടിച്ചു പോകേണ്ടവന്റെ ഔദാര്യം
ആവശ്യമാണെന്നു

വരകള്‍ വെറും വരകളാണു
വേഗതക്കടിപ്പെട്ടു ചതഞ്ഞ സീബ്രകള്‍.