ആരായിരുന്നാദ്യം ചാടിയത്
നീയോ ഞാനോ
ആരാണാദ്യം പുറംകണ്ടത്
നീയോ ഞാനോ
ഞാന്‍ തന്നെയായിരിക്കണം
ഒതുക്കുകള്‍
എനിക്കുമാത്രമറിയുന്നത്
ഓരോ പടവുകളും പടുത്തത്
ഓരോ അന്ധമായ കൂപ്പുകുത്തലിലെ
നിലയില്ലാ തണുപ്പിന്റെ
നിലവിളികളാള്‍
നിലയില്ലാ വിളികളാല്‍
ഓരോ തകര്‍ച്ചയും
ഓരോ ഒതുക്കുകള്‍
അതിനാല്‍
ഏതാഴത്തിലേക്കുമെനിക്കെത്താനാകും
ഏതു പാതാളത്തില്‍ നിന്നും കരപിടിക്കാനും
ഏതു പ്രണയത്തിലും
എനിക്കൊരു
കയറേണിയുണ്ട്
പാതാളക്കരണ്ടിയുണ്ട്
ഓക്സിജന്‍ സിലിണ്ടറുണ്ട്
പ്രണയത്താല്‍ ഞാനിനി ശ്വാസം മുട്ടില്ല
എന്റെ വിലാപങ്ങള്‍
പുറംകേള്‍ക്കാതെ വെറുതെ
പ്രതിധ്വനിക്കില്ല
എനിക്കിപ്പോള്‍ നിന്നെയോര്‍ത്തുമാത്രം
ശ്വാസം കിട്ടുന്നു.
