Thursday, March 12, 2009

കവികള്‍ക്കൊരു ക്വട്ടേഷന്‍


9248 മലയാള കവികളെ വധിക്കണം
ഇന്നു തന്നെ നടക്കണം
ഞാനടക്കം കത്തിച്ചാമ്പലാകണം
പറഞ്ഞതു പ്രകാരം തുക
കൂടുതല്ലാതെ കുറവുണ്ടാകില്ല

കവികളായതുകൊണ്ട്
അവര്‍ പ്രധാനികളോ
വിലമതിക്കുന്നവരോ
അല്ലാത്തതു കൊണ്ടും
പ്രജകള്‍ വാഴാത്തകൊച്ചു കൊച്ചു ദ്വീപുകളുടെ
എകാധിപതികളായതു കൊണ്ടും
നിങ്ങളുടെ വിലക്കിഴിവില്‍
‍കൂടുതല്‍ കവികളെക്കൂടി ചേര്‍ക്കുന്നതാണ്


ആത്മഹത്യക്കായി
സൈദ്ധാന്തിക വെല്ലുവിളികളില്ലാത്തതിനാല്‍
‍അപകടമരണങ്ങള്‍
‍കുറേ ചോദ്യങ്ങള്‍ക്കെളുപ്പത്തില്‍
ഒറ്റവാക്കില്‍‍ ഉത്തരമാകും

ഒരേ ഭാഷയില്‍
ഒരേ രൂപത്തില്‍
ലോകത്തിനോട് ഒരുമപ്പെടുന്നതിനാല്‍
എതിര്‍പ്പുകള്‍ തീരെ ഉണ്ടാകില്ല
ഒറ്റ കുഴലൂത്തില്‍എലികളെപ്പോലെ
കുഴിമാടത്തിലേക്കു
കുതിച്ചു കൊണ്ടിരിക്കും


എല്ലാ‍വരും ഒരേ ശബ്ദത്തില്‍
താഴ്ന്നസ്ഥായില്‍
ഒച്ചയിടുന്നതെന്തെന്നു ചോദിക്കരുതേ
വേറിട്ട ശബ്ദം
അലോസരപ്പെടുത്തുമെന്നറിയില്ലേ
അലോസരതകള്‍
‍അലസഗമനത്തെ തടസ്സപ്പെടുത്തും

കാലമൊരു ജലാശയമാക്കിയവര്‍
ഒരു കുത്തൊഴുക്കും സാധ്യമാക്കാത്തവര്‍
‍ചെറുവാക്കെറിഞ്ഞു തീര്‍ത്ത കുഞ്ഞോളങ്ങള്‍
പ്രളയമല്ലോ
എന്നു അമിതവിശ്വാസിയാകുന്നവര്‍

ഇതൊക്കെയല്ലേ ഞങ്ങള്‍ക്കാവൂ
ഞങ്ങള്‍ ഞങ്ങളെത്തന്നെ മാത്രം വായിച്ചു
രതിയറിയുന്നവര്‍
സ്വയംഭോഗത്തിന്റെ ചക്രവര്‍ത്തിമാര്‍
‍കവികള്‍ മാത്രമുള്ള രാജ്യത്തിനായി
ഉദയംകൊണ്ടവര്‍

കെണിയാണെന്നറിഞ്ഞും
ആകര്‍ഷിക്കപ്പെട്ടവരെത്തും
മരണമാണെന്നറിഞ്ഞും വിഴുങ്ങും
കവികളല്ലേ എളുപ്പമായിരിക്കും കാര്യങ്ങളെല്ലാം
പറഞ്ഞതില്‍ നിന്നുകുറച്ചെങ്കിലും കുറച്ചു കൂടെ


ഒന്നും സംഭവിപ്പിക്കാത്ത
കവിതയിലെ വരികളായി
കീഴടങ്ങിയ ഒരു ജനതപോല്‍
തലകുനിച്ചവരെത്തും
അടച്ചിട്ടാലുമില്ലെങ്കിലും
കത്തിക്കുമ്പോള്‍
‍ആരും പുറം വാതിലിലേക്കു കുതിക്കില്ല
ഉറപ്പ്



വാല്‍ക്കഷ്ണം:

അവര്‍
‍കത്തിച്ചാ‍മ്പലയതിനു ശേഷം
കണ്ടെത്തിയ എണ്ണമറ്റ കവിതകളില്‍
‍തലക്കെട്ടിനു മുകളിലെ
കവികളുടെ പേരുകള്‍ മാത്രം കരിഞ്ഞു പോയിരുന്നു

പിന്നീടവ
ഒരേ കവിയുടെ
ഒരേ കവിതകളുടെ ഭാരമായി
ചരിത്രത്തില്‍ സ്ഥാനം പിടിച്ചെന്ന്
കാലത്തില്‍ താഴ്ന്നു കിടന്നെന്ന്

4 comments:

സുനില്‍ കൃഷ്ണന്‍ISunil Krishnan said...

ഇതൊന്നുമാരും കാണുന്നില്ലേ? ങും.

എന്റെ വീട്‌ said...

'മെയിലായി' വന്ന ആളിനെ അറിയാമായിരുന്നെങ്കിലും
ഈ ബ്ലോഗിന്റെ ഉടമസ്ഥനാണെന്ന്‌ കണ്ടുപിടിച്ചതിന്നാണ്‌.
അത്‌, "സ്വന്തമായുണ്ടാക്കിയ കുഞ്ഞോളങ്ങളുടെ"
ചന്തം നോക്കിയിരുന്നതുകൊണ്ടല്ല.
കമ്പ്യൂട്ടർ സാങ്കേതികതയിലുള്ള അജ്ഞത കൊണ്ടാണ്‌.
നിങ്ങളുടെ ചിന്തകൾ അതിന്റെ എല്ലാ തീവ്രതയോടെയും
എനിക്കുൾക്കൊള്ളാനാവുന്നു.കവിതയുടെ
പോക്കുവരവിനെക്കുറിച്ചെഴുതിയത്‌ വായിച്ചപ്പോൾ ആർ.
രാമചന്ദ്രന്റെ വരികൾ ഓർത്തു."എഴുതുകയും എഴുതാതിരിക്കുകയും
ചെയ്യുന്നവനാണ്‌ കവി" എന്ന്‌.ഇനിയും വരാം .

ശ്രീഇടമൺ said...

ഒന്നും സംഭവിപ്പിക്കാത്ത
കവിതയിലെ വരികളായി
കീഴടങ്ങിയ ഒരു ജനതപോല്‍
തലകുനിച്ചവരെത്തും
അടച്ചിട്ടാലുമില്ലെങ്കിലും
കത്തിക്കുമ്പോള്‍
‍ആരും പുറം വാതിലിലേക്കു കുതിക്കില്ല
ഉറപ്പ്......

വളരെ നല്ല കവിത..
ആശയം അതി ഗംഭീരം...
തുടരുക...
എല്ലാ ആശംസകളും...*

fayaz said...

എനിക്കും കൊല്ലണം ഒരു കവിയെ.. ഒന്നു കൊല്ലട്ടെ....??
ചുമ്മാ ഒന്നു അനക്കി നോക്കുന്നതാട്ടൊ.. അനങുമോ എന്നറിയാമല്ലൊ...??
എന്തരൊക്കെ പറഞാലും സംഗതി കൊള്ളാം...